AWIT NG LULUSONG NA MAGSASAKA

"AWIT NG LULUSONG NA MAGSASAKA"

ni Rener Concepcion

Mas hirati na ang kamay 

Sa pagdurog ng tiningkal 

Sa lubid at sa tatangnan 

Ng ararong may pamungkal.

Paglipatin na lang sana 

Ng usbong, supang o bunga 

Mas madali ang pumala 

Sa magsulat, sa magbasa.

Kaya malaking trabaho'ng

Umaninaw sa polyeto

Kahit ba iya'y numerong

Guguririan ko 'ka mo?

Pero alam ko rin naman

Boto'y boses kong lilitaw

Pinili ko'y ibibilang -

Minsanang kapangyarihan.

Dahil diyan umaahon

Ang konsehal at ang meyor

Saka nanlilimos-tulong

Nangangako ng pagsulong.

Dahil diyan ang pag-ibis 

Paglayo muna sa bukid 

Sa presinto 'ta sasapit 

Hahawak kita ng lapis! 

Tingni kung sinong nagpar'yan 

Nu'ng ang ilog ay umapaw 

May bigas ba s'ya't pang-ulam 

Nu'ng t'yan nata'y walang laman?

Ganyan din ang apelyido

Nu'ng sa Mamay sumaklolo

Noong s'ya'y naagrabyado

Napahabla, nagkakaso.

Baka hindi yan sa ata't 

Sa sarili lang na bulsa 

Tayo pa ang magdadala 

Kesa siya ang pupunta.

Taon na ba ang serbisyo 

O may buhay na sarado? 

Gumagarantiyang tao'y 

Iyo bagang kabisado? 

Saka natin maisulat 

Dulo ng balitaktak 

Pag sala, kita'y maghirap 

Pag s'wak, buhay-aliwalas! 

Aya't tapos na ang pulong 

Par'ne na't kita'y lumusong 

Magdambana ng desisyon 

Nakataya'y banda roon!

 

BACK